I tohu te marama i hipa i te matenga o Kaiwhakawā Norman Francis Smith, te hea tuarua o mua o te Rōpu Whakamana i te Tiriti o Waitangi me te kaiwhakawā matua tuarua o te Kōti Whenua Māori. Ko Kaiwhakawā Smith te hea tuarua mai i te tau 1993 tae noa ki tana tāoki i te tau 1998. I ēnei tau, ko ia te mana whakahaere mō ngā hui ā-kaiwhakawā ohotata, whakatikahanga maha hoki. Nā te mea, i tipu ake ia i Cromwell, ki waenga o Ōtākou, i ngā 1940, he āhua tōtika, tūhonohono tana mahi i runga i te Taraipiunara. I te nuinga o te wā, ka tukuna e ia ana whakataunga ā-waha, i te mutunga o te hui ā-kaiwhakawā toru hāora. E kore tētahi e pōhēhē he aha ngā whakaaro o Kaiwhakawā Smith mō tētahi take. He tino piripono ia ki ana kaimahi o te Taraipiunara. He tohu i tēnei piripono, ka tito tētahi kaimahi, a Turei Thompson, i tētahi waiata poroaki mīharo mō taua kaiwhakawā i te tau 1998. Ka tangi ia i te waiata, ā, ka tino mokemoke ki a ia te hunga e maumahara tonu ana ki a ia i runga i te aroha.
E te ihorei, kua takahia e koe te ara whano ki te pō. Tomo atu rā koe ki roto i te whare matapōrehu o Hine-nui-i-te-pō. Haere atu rā koe e te uri o paheke: e taku kuru hauhunga, e taku āhuru mōwai. Nei mātou, tō tira o Te Kooti te Kooti Whenua Māori, o Te Roopu Whakamana i te Tiriti o Waitangi e tangi apakura ana ki a koe. Waiho mā muri nei ō kaupapa e kōkiri – kia mau, kia ita. Hui e, tāiki e!